الرئيسية / خواطر ونصوص شعرية / ڤالو عني رومية!/ بقلم: خديجة بن عادل

ڤالو عني رومية!/ بقلم: خديجة بن عادل

 

 

 

 

 

ڤالو عني رومية!

بقلم: خديجة بن عادل

…………………………

راه جاني مرسول وڤالو عني رومية

يا حسراه على الدنيا الفانيا المربوية

بنت العربان ذِيك الحرة الديسية

برهومية شان معلومة في أُمالِية

معروفة بالخال والخلخال يا عينية

تشرنينة وحده تلاڨي فرسان الصحرا تتغزل بية

كحلة لرماش ، حنة تفحفح مابين جبال سالات وطواية

ولات اليوم عيون الحساد تاكل فية

شوف يا ميمون مادارو لحباب وقاشية

ڤرب يا سامع وانصت لية

أنحاكيك بصنعة يدية

وأحكم بالحق ياك قدوة مافيه خطية ولاقصية

منصبة عليها براد التاي مجمر على الوڤيد ومعاه نعناع شوية

والحديث ميحلاش بلا المقزل يدور مابين طبڤ وركبية

صوفو يرڤاڤ منو خيط البرنوس وحتى الزربية

هذا رڤم مزابي والأخر شلالي والخلالة تشهد علية

حولي ، حصير ، ولا قشبية

وماتزهاش خواطري بلا ما تڤعد وحدة مسامية

واختار يا مختار غداك كسرة رقدة

مطلوع ، فطير حتى الشواط مذابية

الكل موجود ، هرماس وضلفة راعي لية

مثرد رفيس ولا ڤصعة مسفوف طرطڤ حباته مابين سنية

ولا حار شخشوخة ،عَيش سيدي ابراهيم الغول حن علية

سرجي ديما محطوط عقاش ، مجبود ، فتلة

من القل والقالة ،حتان عنابة القسمطيني داير حالة

والشاوي بثرور ولحاف وزينو جبين تتباهى بيه الرجالة

أرواح للنايلي مدور وڤصة راس من جلفة لقواط وشامة

واذا هذا الكل ومتعلمتيش أرواحي نعطيك الكيفية

راها الهيدورة مازالها بيضا ناصعة تحت رجلية

حَمَّارة شكوة تستنى نطلع زبدتها برجة

والڤربة منهيه فوڤها قبوشة

مدهونة بالمْهَل شربة منها باردة

ياه اذا جات المواسم مڤدمة

فريك ومرمز من بريواني الخنڤة بهذا عالمة

من خزرة وحدة نعرف النعجة اذا وحيدة ولا متاومة

قرداشي مايخطيش داري والناس تتقيزب بية

وعلاه علية قاسية ومني حاقدة

بجاه الصلاح والناس لملاح راني جيتك ناوية

طفي ناري ولاتخلي حرڤة مشعالي ڤادية

راه جفاني النوم والأحلام مني هاربة

ياه يا ماري الباهية بعد كل هذا وڤالو رومية

عن دينا وملتنا خارجة

متبكيش يا قليبي اذا ڤالو رومية

سعدي أنا بميمتي قرة عيني أنا بها زايخة

بعد الإسلام ولاّت العصابة والصلاية

بلسانها شادة وفي دعاها خاشعة

هذا الكل وڤالو رومية

امالا اذاكنت عربية

كيفاش تكون لحوال دايرة ؟

حسبي محبة الله والرسول عليهم مْعَوْلة .

وتكفيني رضاية الوالدين تفتحلي لبواب المْسَكرة . !!

 

قصيدة كتبت سنة 2012 وتحصلت على المرتبة الأولى في مسابقة (شعر العامية) في ملتقى الأدباء والمبدعين العرب

عن waha alfikir

اضف رد

لن يتم نشر البريد الإلكتروني . الحقول المطلوبة مشار لها بـ *

*

x

‎قد يُعجبك أيضاً

ترياق محمد: الشعر هبة من الخالق تنمو فينا دون أن نخطّط لها عن سابق نية

  ترياق محمد: الشعر هبة من الخالق تنمو فينا دون أن نخطّط ...

الدمعة الأخيرة/ بقلم: ناديا رمال

                        ...

اقتصاد الانتباه/ بقلم: محمد عبد الكريم يوسف

                اقتصاد الانتباه بقلم: محمد ...

عفرين أنا/ بقلم: ميديا شيخة

                        ...

لا تقترب…/ بقلم: منى عثمان

                        ...

حب بلا عنوان/ بقلم: ربى بدر

                        ...

وطن يتعبد داخلي/ بقلم: رغد أحمد

                        ...

تركتُ قلبي لتحتلّيه أنتِ/ بقلم: عطا الله شاهين

            تركتُ قلبي لتحتلّيه أنتِ بقلم: عطا ...