يا دار / بقلم: باسل النجم

يا دار / بقلم: باسل النجم

ـــــــــــــــ

يادار حاجتنا بكي

جف الدمع فوق المقل

لا تحزني ولا تشتكي

وتتعذبي مافي امل

لاتندهي خلص الحكي

مافي حدا ..كلو.. رحل

**************

كنتي مضافة ومملكي

ضيوف وحبايب والأهل

(حيالله) مش كلمة وحكي

(حيالله) قولن ..مع فعل

بسكوت راحة ممسكي

هيل وقهاوي بالدلل

نايم ع جنبو مرتكي

عس الحطب فوق(القصل)

واللي على كفو تكي

يسمع قصايد مع زجل

**************

من البرد سنّو تكتكي

سرج الأصيلة واتكل

نياشين صدرو مشكشكي

شماغات من فوقا عُقل

شامخ أبد بالمعركة

قالوا سبع …هذا البطل

حتى السياسة محنكي

أفعالهن مضرب مثل

*************

(قلشين)كنزة (مهرتكي)

(فرنيّة) لبنة مع بصل

(يكربل) تبن (بالبايكي)

راعي الغنم توّه وصل

والبنت جاية ملبكي

لا (روش) لا حمرة وكحل

(منشل) (روايا) و(دربكي)

والدّابّة حملا ثقل

وشوف الصبايا ( صهصكي)

لو شب بعينو يدل

(يامّي) شفت كنّة لكي

(فلانة) إلي لو حد سأل

***********

يادار حقك تشتكي

راحوا القرايب والأهل

رغم الفقر عم تضحكي

بالخير مليانة السلل

إجت الحضارة مفزلكي

صابت عوايدنا بشلل

يادار شو نفع الحكي

دخلك قوليلي شو العمل

. لمن لا يعرف….

. القصل: مابقي من التبن في الكربال ويستخدم لإشعال الحطب في المدفأة أو في التنور

. قلشين: جرابات

.مهرتكي: مهترئة

.فرنية: تشبه الفطيرة اليوم لكنها اكبر حجما كانت توضع ضمنها ..لبنة وبصل أو كشك أو يقطين الخ…

.يكربل: يقوم بكربلة التبن والكربال كالغربال لكن ثقوبه اكبر

.البايكي: البايكة ..الزريبة

.منشل: وعاء من التنك كانت تحمله البنت على كتفها ..بعد ملئه بالماء.

.روايا: وعاءان من الجلد يوضعان على ظهر الدابة ويملآن ماء

.دربكي: المشي بغير اتزان وبسرعة

.صهصكي: ضحك بطريقة مميزة أو بصوت عال

.يامّي: يا أمي.

.

أبو نواف باسل النجم

2021/11/20