من وين طلعتلي إنت/ بقلم: سامية زين

كنت تعوّدت كون
لوحدي بهيدا الكون
وما عندي حدا بيمون
ع أهاتي غير الرب
من وين طلعتلي إنت
وقلبت حياتي قلب

وكنت تعلّمت عيش
ما إسأل الدّني ليش
وأحلامي متلي دراويش
ما فيها عرض وطلب
من وين طلعتلي إنت
وقلبت حياتي قلب

وكنت عوّدت حالي
إن الحزن حلالي
وإن رقص مرة خيالي
يحس انو ارتكب ذنب
من وين طلعتي إنت
من وين
وقلبت حياتي قلب

وكنت نسيت الاشواق
وكل سكرات العشاق
كيف معك نبضي فاق
ورجع يدق طبول الحرب
من وين طلعتلي إنت
وقلبت حياتي قلب

وكنت
كنت خانق الحياة
وللموت قدملو الطاعات
وياما قلتلو هات
هات
ولا مرة حسيتو صعب
من وين طلعتلي إنت
وقلبت حياتي قلب

وكنت إمشي بكل طريق
ما معي غير الله رفيق
صار قلبي يفتح تحقيق
تا يشوفك بكل درب
من وين طلعتلي إنت
وقلبت حياتي قلب

وكانت حياتي قناعة
وماشية متل الساعة
والأمل مجرد إشاعة
لوجوده ما في سبب
من وين طلعتلي إنت
وقلبت حياتي قلب

وكنت بطّلت غار
وقلبي بطل يشعل نار
هلق صار ليلي نهار
وما بعرف شرقي من الغرب
من وين طلعتلي إنت
وقلبت حياتي قلب

قلي
بـ بُعدك كيف بدي كفي
وناقص من قلبي شأفة
بَعدك رح إنطفي
رح إنطفي
ومتل الرماد والهوا هب

بـ بُعدك كيف بدي كفي
وكفك مش ماسك كفي
يا دني خَلَص بيكفي
بيكفي
تركيني
تركيني
تركيني شو ما عندك قلب
من وين
من وين طلعتلي إنت
وقلبت حياتي قلب
…
…
#سامية_زين