قميص المجنون/ بقلم: ميريام حيدر

قميص المجنون/ بقلم: ميريام حيدر

ـــــــــــــــــ

قميص المجنون بالمقلوب

وكمامو طوال والقيد من الخلف

والشعر هاك القميص والشاعر هاك المجنون

والحب متل الشعر ما بدو إيدين

ولا زرار قميص من قدام

بدو إحساس فوق الحس

وبدو إجرين فوق السما

وبدو عقل فاضي من قيل وقال ومن هندسة أمتار

لا تاريخ ولا جغرافيا

بس شوية فلسفة فوق عقول الصغار

أولها فحيح حية بجنة الأذكار

وآخرها قطفة قمح من خبز الله

لا نْعرف من عجنو ولا بأي فرن تْقَمّر

بس حوّا لي بتعرف وسرها حطتو بقلب آدم

ومن وقتها صار الحب جنون ..

لا ح يكِن .. ولا ح يكِن ..

وآدم من يومها مجنون إسمو صار