ÇIYAYÊ KURMÊNC / Gulistan Awaz

ÇIYAYÊ KURMÊNC/ Gulistan Awaz

________

Sê sal in

Bi deziyê azaran

Rojên xwe didirûn

Şahî kefenkirî ye

Sê sal in

Ji peyalên derd û xeman

Demên xwe dinoşin

Dadmendî binaxkirî ye

!Ax dayê

Ku biba

Min xwîna xwe

Weke lehiyeke birçî

Ji ser bedena te

Hemû êş û stiriyên qirêj

Daqurtandana

Temenê xwe

Li temenê pakrewanan zêde bikira

Zarok û mindal

Li çiyayê Kurmênc

Bê dêwbav

Nemabana

Ku biba

Min çavên xwe

Ji şevên Efrînê re bikirina find

Li sêsed û şêst û şeş gundan

Tirs bi ronahiyê

Bihelandana

Tîpên navê xwe

Bikirana şitlên zeytûnan

Dêmên heft navçeyan

Bixemilandana

Û şitla heyştan

Li ber kêlê Bekirê Şêxo

Zaveyê Efrînê

Biçanda