شوق البحر / بقلم: وعد جرجس
ــــــــــــــــــــــ
يا بَحرْ يا جبَّار عَ مَدّ النَّظرْ
متلَكْ أنَا مأسورْ دَابحنِي الضَّجَرْ
بالعينْ هالموجَاتْ تتلاطَمْ شَقَىْ
والشَّطْ فيها غرِقْ بالهَمْ انغمَرْ
كَمْ بِيتْ شِعرْ تغزّلوا بسحرَكْ أنِتْ
وكَمْ عاشق تعمّد بروحَكْ مفتكِرْ؟
شكلَكْ حلوْ بتأجِّجْ بصدري الوَلَهْ
بَسْ الأصل غدّار وعناقَكْ خَطَرْ
صَمتكْ مخَبّي بمَوجتُوْ مَليونْ سرْ
زَتُّنْ بحضنَك يَومْ جانِنْ وانتحَرْ
بتشبَهْ حَبيبِي يا بَحرْ متلو مَلَكْ
وبزَرقِةْ عيونو بشوفَكْ منتصرْ
قلّو عَ سرْنَا ان زارَكْ بلحظة سَحَرْ
واروي شفافْ الشَّوقْ عَطشانْ ونَطَرْ
قلّو يجي خيوط السَّنَا رَحْ شَمشْمَا
وبمرْجحَا بكفّي تَيصحَى الفَجرْ
تَتْغَلِغْلِيْ بغيمَاتْ بَردِيْ ياشَمسْ
وتحَمّمِيْ بالنّورْ قلبي المنكِسرْ
وتعبِّيْ وَردْ الزَّنبقْ بصدرِيْ دَفَا
بطَلْتُو وبشروقِكْ روحِي بتنبهرْ
وبغَيبتُو نَارْ الشَّفَقْ تكوِيْ كَوِيْ
ضلوعِيْ وتصرَخْ يا شَمسْ حَنِّ البَحرْ
