الشعر المحكي “مريول الصف” / مها بلان

مريول الصف….

الشعر المحكي..

(خاص)

مريول الصف يلا اشلحي ..

عريسك رح يوصل غدي..

حامل ع كتفو خرج مال..

وخواتم لولو مذهبي..

 

دموع الحزن لا تهرهري..

الحزن شمعه رح ينطفي..

بقصور فوق الجبال ..

ملكه ع الكون بتتوجي..

 

قومي لبسي وتزيني..

بالعقد فوق الخال

وبرنة الخلخال..

الصبايا رح تحسدك..

عاهاك البخت الهني..

 

مش هم تحبي وتقنعي..

أو تلعبي وتتعلمي..

ولاهم إن  قلبك مال..

زغيري بعدك عالهوى

وع محبة الرجال..

 

قومي لبسي وتمايلي

بالطرحه والسلسال..

وبخصرك الميال

بالذهب رح تتشنشلي

 

لاتشتكي  أو تندهي..

روحي اسألي ولاتخجلي..

الدني يابنت الناس..

سكر نبات بتم الغني..

 

بقلم: مها بلان